திருட்டு வழக்கு பதிவு செய்ய லஞ்சம் வாங்கிய இன்ஸ்பெக்டர் உள்பட மூன்று பேர் சஸ்பெண்ட் .

எப்.ஐ.ஆர். பதிவு செய்ய ரூ3அயிரம் லஞ்சம் பெற்றதாக கோயம்பேடு குற்றபிரிவு காவல் ஆய்வாளர் உள்ளிட்ட 3 பேர் சஸ்பெண்ட் செய்யப்பட்டனர்.

கோயம்பேடு காவல்நிலைய குற்றப்பிரிவுக்கு புகார் அளிக்க வந்தவர்களிடம் குற்றப்பிரிவு காவல் ஆய்வாளர் தேன்தமிழ் வளவன், எஸ்.ஐ. மூர்த்தி, தலைமைக்காவலர் கிருஷ்ணன் ஆகியோர் ரூ3 ஆயிரம் லஞ்சம் பெற்றுள்ளனர்.

இது தொடர்பாக மாநகர காவல் ஆணையர் இராஜேந்திரனுக்கு புகார் அளிக்கப்பட்டது. உடனே லஞ்சம் பெற்ற காவல் ஆய்வாளர், துணை ஆய்வாளர், தலைமைக்காவலர் ஆகிய 3பேரையும் இடைநீக்கம் செய்து இராஜேந்திரன் உத்தரவிட்டார்.

மாமுல் வசூலித்த திருச்சி மாநகராட்சி ஊழியர் கைது

திருச்சியில் கறிக்கடைக்காரரிடம், தீபாவளி மாமூல் வசூலித்த மாநகராட்சி ஊழியரை, லஞ்ச ஒழிப்பு போலீசார் கைது செய்தனர். தீபாவளி பண்டிகையை முன்னிட்டு, திருச்சியில் அதிகளவில் இனாம் வசூலிக்கப்படுவதாக, லஞ்ச ஒழிப்பு போலீசுக்கு புகார் வந்தது. லஞ்ச ஒழிப்பு போலீஸ் டி.எஸ்.பி., அம்பிகாபதி தலைமையிலான போலீசார், மாநகர் முழுவதும் மாறுவேடத்தில், கண்காணிப்பு பணியில் ஈடுபட்டனர். திருச்சி மாநகராட்சி 53வது வார்டுக்குட்பட்ட உய்யக்கொண்டான் திருமலையில் உள்ள, கறிக்கடைக்காரர் மணியிடம், 500 ரூபாய் லஞ்சம் வாங்கிய, பாலக்கரையை சேர்ந்த மாநகராட்சி சுகாதார மேற்பார்வையாளர் கமருதீனை கைது செய்து, அவரிடமிருந்த 5,000 ரூபாயை, லஞ்ச ஒழிப்பு போலீசார் பறிமுதல் செய்தனர்.

லஞ்சம் வாங்கிய நாமக்கல் செய்தி மக்கள் தொடர்பு அதிகாரி சஸ்பெண்டு .

நாமக்கல் மாவட்ட செய்தி மக்கள் தொடர்பு அதிகாரியாக பணியாற்றி வந்தவர் பால்ராஜ் (வயது53), இவரது ஜீப் டிரைவர் செல்வம். இவர்கள் ஜவுளி விற்பனை கண்காட்சி அமைக்க அனுமதி பெற்றுத்தர ரூ. 10 ஆயிரம் லஞ்சம் வாங்கியதாக நாமக்கல் மாவட்ட லஞ்சஒழிப்பு போலீசாரால் கைது செய்யப்பட்டனர். பின்னர் அவர்கள் கோர்ட்டில் ஆஜர்படுத்தப்பட்டு சேலம் மத்திய சிறையில் அடைக்கப்பட்டுள்ளனர்.

இதற்கிடையே செய்தி மக்கள் தொடர்பு துறை இயக்குனர் அலுவலகத்தில் இருந்து நாமக்கல் மாவட்ட கலெக்டர் அலுவலகத்துக்கு லஞ்ச வழக்கில் கைதான செய்தி மக்கள் தொடர்பு அதிகாரி பால்ராஜ், ஜீப்டிரைவர் செல்வம் ஆகியோர் சஸ்பெண்டு செய்யப்பட்டு உள்ளதாக தெரிவிக்கப்பட்டு உள்ளது.

லஞ்சம் வாங்கிய பெரும்பாலை மின் வாரிய பொறியாளர் கணேசன் .கமர்சியல் இன்ஸ்பெக்டர் இருதயசாமி கைது

தர்மபுரி மாவட்டம் பெண்ணாகரம் பக்கமுள்ளது சின்னகடமடை. இந்த ஊரை சேர்ந்தவர் ராஜேந்திரன் (வயது47). விவசாயி. இவருக்கு 8 ஏக்கர் நிலம் சொந்தமாக இருக்கிறது.இவர் தனது நிலத்தில் கடந்த ஒரு ஆண்டுக்கு முன் ஆழ்துளை கிணறு அமைத்தார். அதற்கு மின் இணைப்பு கேட்டு கடந்த 29-8-2008-ல் மனு தாக்கல் செய்தார்.

அதன் பிறகு புதிய வீடு கட்டினார். அந்த வீட்டிற்கும் மின் இணைப்பு கேட்டார். இந்நிலையில் பெரும்பாலை மின் வாரிய அலுவலகத்தில் பணியாற்றும் உதவி பொறியாளர் கணேசன் (25).கமர்சியல் இன்ஸ்பெக்டர் இருதயசாமி (45) ஆகியோர் மின் இணைப்புக்கு ரூ. 30 ஆயிரம் பணம் கேட்டுள்ளனர்.

இதுகுறித்து ராஜேந்திரன் தர்மபுரி லஞ்ச ஒழிப்பு டி.எஸ்.பி. நாச்சியப்பன். இன்ஸ்பெக்டர் கிருஷ்ணராஜன் மற்றும் போலீசாரிடம் புகார் செய்தார். அதன்அடிப்படையில் ராஜேந்திரன் இன்று காலை 10 மணியளவில் பெரும்பாலை மின் அலுவலகத்தில் ரூ. 3 ஆயிரம் லஞ்சம் கொடுத்தார்.

அப்போது அங்கு மறைந்திருந்த லஞ்ச ஒழிப்பு போலீசார் பொறியாளர் கணேசன் .கமர்சியல் இன்ஸ்பெக்டர் இருதயசாமி ஆகிய 2 பேரையும் கைது செய்தனர்.

லஞ்சம் கொடுக்காமல் செய்த வேலைகளுக்கு பணம் வாங்குவது எப்படி? அரசு அலுவலக வாசலில் படுத்து புரண்ட காண்டிராக்டர்.

திருவள்ளூர் மாவட்டம் எல்லாபுரம் ஒன்றியத்தில் 53 ஊராட்சிகள் உள்ளது. இதில், 10 ஊராட்சிகளில் அனைத்து கிராம அண்ணா மறுமலர்ச்சி திட்ட பணிகள் நடைபெற்று வருகிறது.

இந்த ஒன்றியத்தில் சுமார் 15 ஒப்பந்தக்காரர்கள் பணிகளை எடுத்து செய்து வருகின்றார்கள். அக்கரப் பாக்கம் மற்றும் ஆலப் பாக்கம் கிராமத்தில் வெங் கல் சீனிவாசன் என்ற ஒப்பந்தக்காரர் சுமார் ரூ.23 லட்சத்துக்கு பணிகள் எடுத்து செய்து வருகிறார்.

ஆமிதா நல்லூர், பெரிய பாளையம், பனப்பாக்கம், மாகரல், கொமக்கம்பேடு, பூச்சி அத்திப்பேடு ஆகிய ஊராட்சிகளிலும் இப்பணிகள் நடைபெற்று வருகிறது.

இந்த பணிகளை உதவி செயற் பொறியாளர் கௌசல்யா, உதவி பொறி யாளர்டார்வின் குமார், விஜயகுமார் ஆகியோர் பார்வையிட்ட பின்னர் தான் பணிகள் செய்ய வேண்டும். அதே போல் 3 அதிகாரிகளும் கையெழுத்து போட்டால் தான் செய்த பணிகளுக்கு ஒப்பந்தக்காரர்கள் பணம் பெற முடியும்.

காண்டிராக்டர் வெங்கல் சீனிவாசன் 6 பணிகள் செய்து முடித்துள்ளார். அதற்கான பணம் பெறுவ தற்கு அதிகாரிகளிடம் கையெ ழுத்து வாங்குவதற்காக கடந்த ஒரு வாரமாக எல்லா புரம் ஊராட்சி ஒன்றிய அலுவலகத்துக்கு அலைந்துள்ளார்.

நேற்றும் காலை முதல் மாலைவரை அலுவலகத்தில் காத்திருந்தார். சம்பந்தப்பட்ட 3 அதிகாரிகளும் வர வில்லை.

இதனால் ஆத்திரம் அடைந்த காண்டிராக்டர் வெங்கல் சீனிவாசன் அலுவ லக வாசலின் குறுக்கே படுத்து உருண்டார். சுமார் ஒரு மணி நேரம் வாசலின் குறுக்கே அவர் படுத்தி கிடந்ததால் அலு வலகத் தில் இருந்த ஊழியர்கள் யாரும் வெளியே வரமுடிய வில்லை.

இது பற்றி சம்பந்தப்பட்ட 3 அதிகாரிகளுக்கும் செல் போனில் தொடர்பு கொண்டு தகவல் தெரிவிக்கப்பட்டது. இன்று அல்லது நாளை காலை அலுவலகத்துக்கு வந்து கையெழுத்து போட்டு விடுவதாக அவர்கள் உறுதி அளித்தனர். அதன் பிறகு வெங்கல் சீனிவாசன் எழுந்து சென்றார்.

1 1

கடலூர் நகராட்சி கமிஷனரிடம் லஞ்ச ஒழிப்பு போலீஸ் விசாரணை

கடலூர் நகராட்சியில் நிறைவேற்றப்படும் பணிகளுக்காக ஒப்பந்ததாரர்களுக்கு வழங்கப்படும் காசோலைக்கு, 2 சதவீத தொகையை லஞ்சமாக, கமிஷனர் வாங்குவதாக லஞ்ச ஒழிப்பு போலீசாருக்கு தகவல் கிடைத்தது.
அதன் பேரில், லஞ்ச ஒழிப்புத் துறை டி.எஸ்.பி., வேதரத்தினம் தலைமையில் இன்ஸ்பெக்டர்கள் சேகர், திருமால் மற்றும் போலீசார் நேற்று இரவு 7.30 மணிக்கு நகராட்சி அலுவலகத்தில் திடீர் சோதனை செய்தனர். அப்போது, கமிஷனர் மேஜை மீதிருந்த காசோலைகள், அதற்குரிய கணக்குகளை ஆய்வு செய்தனர். பின்னர் கமிஷனர் குமாரிடம் லஞ்ச ஒழிப்பு பிரிவு டி.எஸ்.பி., விசாரணை செய்தார்.
தொடர்ந்து பொறியாளர் மற்றும் கணக்கு பிரிவுகளில் சோதனை நடத்தினர்.டி.எஸ்.பி., வேதரத்தினம் கூறுகையில்,"நகராட்சி அலுவலகத்தில் அதிகாரிகளுக்கு லஞ்சம் கொடுக்கப்படுவதாக கிடைத்த தகவலின் பேரில் கமிஷனரிடம் விசாரணை செய்தோம். அதில், ஒப்பந்ததாரர்களுக்கு 25 லட்சம் ரூபாய் கொடுக்க காசோலை வைத்திருந்தனர். இதுவரை ஒப்பந்ததாரர்களுக்கு வழங்கவில்லை'என்றார்.இது குறித்து நகராட்சி கமிஷனர் குமார் கூறுகையில்,"இது ஒரு வழக்கமான "இன்ஸ்பெக்ஷன் தான்' வேறு எதுவும் இல்லை' என்றார்.

3,000 ரூபாய் லஞ்சம் வாங்கிய டிராபிக் இன்ஸ்பெக்டர் ஆரோக்கியதாஸ் கைது

சென்னை : ஜூஸ் கடைக்காரரிடம் 3,000 ரூபாய் லஞ்சம் வாங்கிய, டிராபிக் இன்ஸ்பெக்டரை லஞ்ச ஒழிப்பு போலீசார் கையும் களவுமாக பிடித்து கைது செய்தனர். சென்னை பாரிமுனையைச் சேர்ந்தவர் திருமலை.நடமாடும் ஜூஸ் கடைகள் வைத்து நடத்தி வருகிறார். நடைபாதையில் ஜூஸ் கடையை நடத்துவதற்காக இவரிடம், எழும்பூர் டிராபிக் இன்ஸ்பெக்டர் ஆரோக்கியதாஸ் மாதம்தோறும் 3,000 ரூபாய் லஞ்சமாக பெற்று வந்துள்ளார். ஆரோக்கியதாஸ் லஞ்சம் பெறுவது குறித்து, லஞ்ச ஒழிப்பு போலீசாரிடம் திருமலை புகார் கொடுத்துள்ளார். லஞ்ச ஒழிப்பு போலீஸ் எஸ்.பி., பவானீஸ்வரி உத்தரவின் பேரில், டி.எஸ்.பி., பொன்னுசாமி தலைமையில் போலீசார், ஆரோக்கியதாஸ் லஞ்சம் பெறும் போது கையும் களவுமாக பிடித்தனர். ஆரோக்கியதாசை கைது செய்து விசாரிக்கின்றனர்.

ரூ.600 லஞ்சம் வாங்கிய திருப்பரங்குன்றம் நகராட்சி பில் கலெக்டர் ராஜா கைது

திருப்பரங்குன்றம், அக். 14-

மதுரையை அடுத்த திருப்பரங்குன்றம் கிழக்கு தெருவை சேர்ந்தவர் ராஜூ (வயது 26). வக்கீல் படிப்பு படித்து முடித்துள்ள இவர் தற்போது மின் வாரிய காண்டிராக்ட் தொழில் செய்து வருகிறார். இவரது அக்காள் லட்சுமி. அவரது கணவர் சிவானந்தம். இவர்கள் அதே பகுதியில் தற்போது வீடுகட்டி வருகிறார்கள்.

புதிய வீட்டிற்கு மின் இணைப்பு பெறுவது தொடர்பாக மின் வாரிய அலுவலகத்தை சிவானந்தம் தொடர்பு கொண்டார். அங்கு புதிய வீட்டிற்கான வரி செலுத்தும் ரசீதை கொண்டு வருமாறு கேட்டுள்ளனர். உடனே சிவானந்தம் திருப் பரங்குன்றம் நகராட்சி அலுவலகத்திற்கு சென்றார். வீட்டு வரி ரசீது வழங்குமாறு கடந்த மாதம் 15-ந்தேதி அவர் மனு செய்தார்.

முதலில் நகராட்சி அலுவலகத்தில் பில் கலெக்டராக வேலை பார்த்து வரும் ராஜா என்பவர் வீட்டு வரி ரூ.335-ம், ரசீது வழங் குவதற்காக தனக்கு ரூ.600-ம் தரவேண்டும் என்று நிபந்தனை வைத்துள்ளார். இது பற்றி யோசித்து சொல்கிறேன் என்று கூறிவிட்டு சிவானந்தம் அங்கிருந்து வந்துவிட்டார்.

2 நாட்கள் கழித்து மீண்டும் ராஜாவை சந்தித்து வீட்டு வரிக்கான ரசீதை வழங்குமாறு கேட்டார். ஆனால் பில் கலெக்டர் ராஜா ரூ.600 லஞ்சம் கொடுத்தால் மட்டுமே வீட்டு வரி ரசீது வழங்கப்படும் என்று கூறியுள்ளார். 3-வது முறையாகவும் சிவானந்தம் சென்று கேட்டார். லஞ்சம் தராமல் ரசீது தரப்பட மாட்டாது என்று ராஜா திட்டவட்டமாக கூறிவிட்டார்.

இதையடுத்து சிவானந்தம் நடந்த சம்பவம் குறித்து தனது மைத்துனர் பிரபுவிடம் கூறியுள்ளார். அவரது ஆலோசனையின் பேரில் இருவரும் மதுரை லஞ்ச ஒழிப்பு போலீசாரிடம் சென்று புகார் தெரிவித் தனர். போலீசார் ரசாயன பவுடர் தடவிய ரூபாய் நோட்டுக்களை சிவானந் தத்திடம் கொடுத்து அதனை ராஜாவிடம் தருமாறு நேற்று முன்தினம் கூறினர்.

ஆனால் நேற்று பில்கலெக்டர் ராஜா விடுமுறை எடுத்து சென்றுவிட்டார். இன்று காலை திட்டமிட்டபடி சிவானந்தம் வீட்டு வரி ரசீதை வழங்குவதற்காக ரூ.600 லஞ்சப்பணத்தை பில் கலெக்டர் ராஜாவிடம் கொடுத்தார். அதனை பெற்றுக்கொண்ட ராஜா தற்போது அலுவலக கம்ப்யூட்டர் பழுதாகி இருப் பதாகவும், எனவே ரசீது எண்ணை (13276) மட் டும் கூறுகிறேன். அதனைக் கொண்டு நீங்கள் புதிய மின் இணைப்பை பெற்றுக் கொள்ளலாம் என்று கூறி அனுப்பினார்.

அப்போது வெளியே தயாராக நின்ற லஞ்சஒழிப்பு போலீசார் அதிரடியாக உள்ளே நுழைந்தனர். லஞ்ச ஒழிப்பு துறை துணை சூப்பிரண்டு குலோத்துங்கன், இன்ஸ்பெக்டர்கள் பெரு மாள்பாண்டி, மணிமாறன், ஜெயக்குமார் மற்றும் போலீசார் லஞ்சம் வாங்கிய நகராட்சி பில்கலெக்டர் ராஜாவை கையும், களவுமாக பிடித்து கைது செய்தனர். இதனால் திருப்பரங்குன்றம் நகராட்சி அலுவலகத்தில் இன்று காலை பரபரப்பு ஏற்பட்டது.

ரூ.10 ஆயிரம் லஞ்சம் வாங்கிய திருச்சி பெண் அதிகாரி ரோசலின் கைது

திருச்சி, அக்.14-

திருச்சி மாநகராட்சி 57-வது வார்டு கவுன்சிலராக உள்ளவர். வனிதா மாநகராட்சி அ.தி.மு.க. கொறடாவாகவும் முன்பு இருந்தார்.

இவரது வார்டுக்கு உட்பட்ட அண்ணாமலை நகரில் மாநகராட்சி சார்பில் தார்சாலை அமைக்க ரூ.8 1/2 லட்சம் நிதி ஒதுக்கப்பட்டது.

இதைத் தொடர்ந்து ரோடு போடும் பணி தொடங்கப்பட்டது. ரூ.5லட்சம் மதிப்புக்கு சாலை போடப்பட்ட நிலையில் ரோடு குறுக்கே தனியார் ஒருவர் காம்பவுண்டு சுவர் எழுப்பி அரசு நிலத்தை ஆக்கிரமிப்பு செய்திருந்தாராம்.

எனவே திருச்சி நில அளவை மற்றும் பதிவேடுகள் துறை, உதவி இயக்குனரிடம் அந்த இடத்தை அளந்த அரசு நிலத்தை மீட்டு ரோடு போட உதவுமாறு கவுன்சிலர் வனிதா கடந்த 13.11.2008ல் மனு கொடுத்தார்.

உடனே இந்த மனு மீது விசாரணை நடத்தி நடவடிக்கை எடுக்கும்படி திருச்சி உதவி கலெக்டருக்கு உதவி இயக்குனர் பரிந்துரை செய்தார். ஆனால் இந்த மனு மீது எந்த நடவடிக்கையும் எடுக்கப்படவில்லை.

இதனால் ரோடு போடும் பணி தாமதம் ஆகியது. எனவே நேற்று முன்தினம் வனிதா உதவி கலெக்டர் அலுவலகத்துக்கு சென்றார்.

அலுவலகத்தில் சம்பந்தப்பட்ட துறை எழுத்தரான ரோஷலின் மாலினியை (வயது54) சந்தித்து தனது புகார் மனு மீது எடுக்கப்பட்ட நடவடிக்கை குறித்து விவரம் கேட்டார். அப்போது பெண் அதிகாரி ரோசலின் மாலினியை தன்னை திருவானைக்கோவிலில் உள்ள வீட்டில் வந்து சந்திக்கும்படி கூறினார்.

அங்கு சென்று அவரை சந்தித்த போது ரோசலின் வனிதாவிடம் ரூ.10 ஆயிரம் லஞ்சம் தந்தால் வேலையை முடித்து தருவதாக கூறினாராம். உடனே கவுன்சிலர் வனிதா மக்களுக்காக ரோடு போட நடவடிக்கை எடுக்கும் நாங்கள் உங்களுக்கு எதுக்கு பணம் தர வேண்டும் என கேட்டார்.

ஆனால் ரோசலின் மாலினி ரூ.10 ஆயிரம் பணம் தராவிட்டால் காரியம் நடக்காது என கூறிவிட்டார். இதனால் அதிர்ச்சி அடைந்த வனிதா லஞ்சம் கேட்ட ரோசலின் மாலினிக்கு பாடம் புகட்ட நினைத்தார்.

உடனே இது குறித்து திருச்சி லஞ்ச ஒழிப்பு தடுப்பு பிரிவு டி.எஸ்.பி. அம்பிகாபதியிடம் புகார் செய்தார்.

போலீசார் கூறிய அறிவுரையின்படி ரசாயன பவுடர் தடவிய ரூபாய் நோட்டு ரூ.10 ஆயிரத்தை நேற்று கவுன்சிலர் வனிதா ரோசலின்யிடம் கொடுத்தார். அதை தனது கணவர் கிருஷ்ணமூர்த்தியிடம் கொடுக்குமாறு ரோசலின் மாலினிகூறினார். அப்போது லஞ்ச ஒழிப்பு போலீசார் லபக்கென்று 2 பேரையும் கைது செய்தனர்.

லஞ்சம் வாங்கி பிடிபட்ட ரோசலின் மாலினி சஸ்பெண்டு செய்யப்பட்டார். மக்களுக்காக ரோடு போட முயன்ற அ.தி.மு.க. பெண் கவுன்சிலரை 11 மாதம் அலையவிட்ட பெண் ஊழியர் பண ஆசையால் கடைசியில் கம்பி எண்ணிக் கொண்டிருக்கிறார்.

கோவை மத்திய சிறையில் அதிரடி சோதனை

கோவை மத்திய சிறையில் போலீசார் அதிரடி சோதனை நடத்தினர்.

சென்னை புழல் மத்திய சிறையில் பல்வேறு முறைகேடுகள் நடப்பதாக ஏராளமான புகார்கள் வந்தன. அதைத் தொடர்ந்து போலீசார் அதிரடி சோதனை மேற்கொண்டனர். அப்போது ஏராளமான சிகரெட், பீடி பண்டல்கள், டி.வி.க்கள், ஆபாச சி.டி.க்கள் மற்றும் கணக்கில் வராத ஏராளமான பணம சிக்கியது.

இதைத்தொடர்ந்து தமிழகத்தில் உள்ள அனைத்து சிறைகளிலும் அதிரடி சோதனைக்கு உத்தரவிடப்பட்டது.

அதன்படி இன்று (13.10.09) கோவை மத்திய சிறையில் அதிரடி சோதனை தொடங்கியது. ஜெயிலில் உள்ள ஒவ்வொரு அறையும் முழுமையாக சோதனையிடப்பட்டது. தடைசெய்யப்பட்ட பொருட்கள் ஏதும் பதுக்கி வைக்கப்பட்டுள்ளதா என்பதை கண்டறியும் வûகையில் இந்த சோதனை நடைபெற்றது.

சோதனையில் ஏதும் சிக்கியதா என்பது தெரியவில்லை. 2 மணி நேரம் நடந்த இந்த சோதனையில் கைதிகளிடையேயும், ஜெயில் வளாகத்திலும் பரபரப்பு நிலவியது.

லஞ்சம் வாங்கிய மறைமலைநகர் நகராட்சி இளநிலை பொறியாளர் நந்தகுமார் சிறையில் அடைக்கப்பட்டார் .

மறைமலைநகர்: சிமென்ட் சாலை அமைத்ததற்கு செக் பாஸ் செய்வதற்கு 30 ஆயிரம் ரூபாய் லஞ்சம் வாங்கிய நகராட்சி இளநிலை பொறியாளர் மற்றும் தலைமை எழுத்தரை லஞ்ச ஒழிப்புத்துறை போலீசார் கைது செய்தனர்.

மறைமலைநகரைச் சேர்ந்தவர் பாலசுப்பிரமணியன். நகராட்சி கான்ட்ராக்டர். இவர் நகராட்சியில், 31 லட்சத்து 50 ஆயிரத்திற்கான சாலை பணிகளை செய்து முடித்தார். பணி முடித்தபிறகு 4 செக்குகள் மூலம் 21 லட்சம் ரூபாய் நகராட்சி சார்பில் வழங்கப்பட்டது. மீதி தொகையினை 10 லட்சத்து 50 ஆயிரம் ரூபாய்க்கான செக் வழங்க, நகராட்சி இளநிலை பொறியாளர் நந்தகுமார்(38) 20 ஆயிரம் ரூபாயும், நகராட்சி தலைமை எழுத்தர் ஜானகிராமன்(48) 10 ஆயிரம் ரூபாயை லஞ்சமாக கேட்டன

லஞ்சம் கொடுக்க விரும்பாத பாலசுப்பிரமணியம் இதுகுறித்து சென்னை லஞ்ச ஒழிப்பு சிறப்பு புலனாய்வு எஸ்.பி., புவனேஸ்வரியிடம் புகார் செய்தார். இதையடுத்து, அவர்கள் ஆலோசனையின்படி ரசாயனம் தடவிய 30 ஆயிரம் ரூபாயை பாலசுப்பிரமணியத்திடம் கொடுத்து அனுப்பினர். நேற்று மாலை 4 மணிக்கு பாலசுப்பிரமணியம் நகராட்சி அலுவலகத்தில் இருந்த இருவரிடமும் லஞ்ச பணத்தை கொடுக்கும்போது அங்கு மறைந்திருந்த லஞ்ச ஒழிப்புத்துறை டி.எஸ்.பி., சம்பந்தம் தலைமையில் இன்ஸ்பெக்டர்கள் விஜய் ஆனந்தன், கந்தசாமி மற்றும் போலீசார் அவர்களை கையும் களவுமாக பிடித்து கைது செய்தனர். பின்னர் இருவரையும் செங்கல்பட்டு தலைமை குற்றவியல் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.

கம்பம் வன ஊழியர்களுக்கு ஐந்து லட்ச ரூபாய் அபராதம் !

கம்பம்: மரங்கள் வெட்டிக் கடத்தப்பட்ட விவகாரத்தில் சஸ்பெண்ட் செய்யப்பட்டுள்ள வன ஊழியர்கள், ஐந்து லட்ச ரூபாய் அபராதம் செலுத்தவேண்டும் என, தேனி மாவட்ட வன அதிகாரி சீனிவாசரெட்டி உத்தரவிட்டுள்ளார்.

வனப்பகுதிகம்பம்களான வெண்ணியார் மேற்கு, கிழக்கு பீட்டுகளில் வன ஊழியர்கள் சிலர் தோதகத்தி மரங்களை வெட்டி கடத்தினர் என, குள்ளப்ப கவுண்டன்பட்டியைச் சேர்ந்த சேகர் புகார் அனுப்பியிருந்தார். மாவட்ட வன அதிகாரி சீனிவாசரெட்டி விசாரணைக்கு உத்தரவிட்டார். போடி உதவி வனப்பாதுகாவலர் வடிவேல் தலைமையில் தனிப்படை அமைக்கப்பட்டது. வனப்பகுதிகளில் நடத்திய ஆய்வில், 21 தோதகத்தி மரங்கள் மற்றும் இதர ஜாதி மரங்கள் வனத்துறையால் வெட்டிக் கடத்தப்பட்டதை உறுதி செய்தனர்.
தனிப்படையினர் கொடுத்த அறிக்கையில், ஆறு லட்ச ரூபாய் மதிப்புள்ள மரங்கள் வெட்டிக் கடத்தப்பட்டன என்று தெரிவிக்கப்பட்டிருந்தது. சம்பந்தப்பட்ட வனப்பகுதியில் பணியில் இருந்த, வன ஊழியர்கள் ஐந்து பேர் சில மாதங்களுக்கு முன் சஸ்பெண்ட் செய்யப்பட்டனர். இவர்கள், "ரெக்கவரி'யாக ஐந்து லட்ச ரூபாய் வரை செலுத்த மாவட்ட வன அதிகாரி சீனிவாசரெட்டி உத்தரவிட்டார்.

லஞ்சம் பெற்ற அதிகாரிகளுக்கு எதிராக நடவடிக்கை - சிபிஎம் வலியுறுத்தல்

அமெரிக்க நிறுவனங்களிடம் இருந்து லஞ்சம் பெற்றதாகக் கூறப்படுவது குறித்து விசாரணை நடத்தி அவர்களுக்கு எதிராக கடுமையான நடவடிக்கை எடுக்க வேண்டும் என்று மார்க்சிஸ்ட் கம்யூனிஸ்ட் கட்சி மத்திய அரசை கேட்டுக் கொண்டுள்ளது.

அமெரிக்க நிறுவனங்களுக்கு சாதகமான நிலையை உருவாக்குவதற்காக லஞ்சம் பெற்ற அதிகாரிகள் பட்டியலையும், எந்தெந்த நிறுவனங்கள் லஞ்சம் கொடுத்தன என்பது பற்றியும் கண்டறிந்து உரியவர்களுக்கு கடுமையான தண்டனை அளிக்கப்பட வேண்டும் என்று மார்க்சிஸ்ட் கம்யூனிஸ்ட் கட்சியின் அரசியல் தலைமைக் குழு (பொலிட்பிரோ) கோரிக்கை விடுத்துள்ளது.

அதிகாரிகள் லஞ்சம் பெற்றதாக வெளிவரும் தகவல்கள் கவலையளிப்பதாக உள்ளது என்றும் மார்க்சிஸ்ட் கம்யூனிஸ்ட் கட்சி கூறியுள்ளது.

நாட்டின் தேசிய நலனுக்கு எதிராக அமெரிக்காவைச் சேர்ந்த நிறுவனங்களுக்கு சிறப்பு அந்தஸ்து அளிப்பதற்காக சம்பந்தப்பட்ட நிறுவனங்கள் அரசு அதிகாரிகளுக்கு லஞ்சம் வழங்கியிருப்பதாக செய்திகள் வெளியாகி இருப்பதாக மார்க்சிஸ்ட் கம்யூனிஸ்ட் கட்சி வெளியிட்ட அறிக்கை தெரிவிக்கிறது.

அமெரிக்க நிறுவனங்களிடம் இருந்து சட்டவிரோதமாக பணம் பெற்ற இந்திய நிறுவனங்களின் பட்டியலை அமெரிக்காவிற்கான இந்தியத் தூதர் மீரா சங்கர், பிரதமரின் முதன்மை செயலர் டி.கே.ஏ. நாயருக்கு அனுப்பியுள்ளார் என்பது குறிப்பிடத்தக்கது.

ரூ1,000 லஞ்சம் - மின் உதவி பொறியாளர் பொறியாளர் சவரிராஜன் கைது

காளையார்கோவில்: சிவகங்கை அருகே, காளையார்கோவில் கல்லுவழியைச் சேர்ந்த முன்னாள் ராணுவ வீரர் இருதயராஜ் (45). புளியடிதம்மம் சந்தியாகு தோட்டத்தை விலைக்கு வாங்கினார்.

மின் இணைப்பை மனைவி பெயருக்கு மாற்ற, உதவி பொறியாளர் அலுவலகத்தில் விண்ணப்பித்தார். உதவி பொறியாளர் சவரிராஜன் 2,000 ரூபாய் லஞ்சம் கேட்டார். அவரிடம் 1,000 ரூபாய் தருவதாக ஒப்புக்கொண்ட இருதயராஜ், சிவகங்கை லஞ்ச ஒழிப்பு போலீசில் புகார் செய்தார்.

நேற்று பிற்பகல் 1.30 மணிக்கு அலுவலகத்தில் இருந்த சவரிராஜனிடம் ஆயிரம் ரூபாயை கொடுத்தார். கண்காணித்த கூடுதல் எஸ்.பி., அவரைப் பிடித்தார். அவரிடம் நடத்திய விசாரணைக்கு பின், வீட்டிலும் போலீசார் சோதனை செய்தனர்.

லஞ்சம் - நாமக்கல் மாவட்ட பி.ஆர்.ஓ., பால்ராஜ் கைது

நாமக்கல் : நாமக்கல் மாவட்ட பி.ஆர்.ஓ., பால்ராஜ், லஞ்ச ஒழிப்பு போலீசாரால் கைது செய்யப்பட்டார். திருச்செங்கோடு பழைய பஸ் ஸ்டாண்ட் பகுதியில், தீபாவளிக்காக சாலை ஓர கடைகளை வைக்க, சாலை வியாபாரிகள் குழு பால்ராஜை சந்தித்து பேசியது. அப்போது, கடைகள் வைப்பதற்கு ரூ. 20 ஆயிரம் லஞ்சம் தர பால்ராஜ் கோரியுள்ளார். பின்னர் 8 ஆயிரத்திற்கு சம்மதம் தெரிவித்துள்ளார்.

இதையடுத்து, வியாபாரிகள் நாமக்கல் மாவட்ட லஞ்ச ஒழிப்பு துறையில் புகார் செய்தனர். நாமக்கல் லஞ்ச ஒழிப்பு துறை டி.எஸ்.பி., பெரிய சாமி ஆலோசனையின் படி, ரசாயனம் தடவப்பட்ட ரூபாயை, வியாபாரிகள் பால்ராஜிடம் அளித்த போது, மறைந்திருந்த போலீசார் அவரை கையும் களவுமாக பிடித்து கைது செய்தனர். பால்ராஜூடன் அவரது டிரைவர் செல்வம் என்பவரும் கைது செய்யப்பட்டுள்ளார். நாமக்கல் ஏ.பி.ஆர்.ஓ., வாக இருந்த பால்ராஜ், கடந்த இரண்டு மாதங்களுக்கு முன் பி.ஆர்.ஓ.,வாக பதவியேற்றார் என்பது குறிப்பிடத்தக்கது.