நீதிபதி தினகரனை தவிர மற்ற நான்கு பேர் சுப்ரீம் கோர்ட் நீதிபதிகளான இன்று பதவியேற்பு

நீதிபதி தினகரனை தவிர மற்ற நான்கு பேர் சுப்ரீம் கோர்ட் நீதிபதிகளான இன்று பதவியேற்கின்றனர்.

மத்திய பிரதேச ஐகோர்ட் தலைமை நீதிபதி பட்நாயக், பஞ்சாப் மற்றும் அரியானா ஐகோர்ட் தலைமை நீதிபதி திராத்சிங் தாக்கூர், குஜராத் ஐகோர்ட் தலைமை நீதிபதி ராதாகிருஷ்ணன், கோல்கட்டா ஐகோர்ட் தலைமை நீதிபதி சுரேந்தர் சிங், கர்நாடக ஐகோர்ட் தலைமை நீதிபதி தினகரன் ஆகியோரை, சுப்ரீம் கோர்ட் நீதிபதிகளாக நியமிக்க, சுப்ரீம் கோர்ட்டின் நீதிபதிகள் குழு முடிவு செய்தது.

ஆனால், இந்த ஐந்து பேரில், கர்நாடக ஐகோர்ட் தலைமை நீதிபதி தினகரன் மீது ஊழல் புகார்கள் கூறப் பட்டதால், அவரின் பெயர் மட்டும் பதவி உயர்வுக்கு பரிந்துரை செய்வது நிறுத்தி வைக்கப்பட்டது. மற்ற நான்கு பேரின் பெயர்கள் பரிந்துரை செய்யப்பட்டன.

இதையடுத்து, அந்த நான்கு பேரையும், சுப்ரீம் கோர்ட் நீதிபதிகளாக நியமிக்க அரசு ஒப்புதல் கொடுத்தது. அவர்கள் நான்கு பேரும் இன்று சுப்ரீம் கோர்ட் நீதிபதிகளாக பதவியேற்கின்றனர். இதன்மூலம், சுப்ரீம் கோர்ட் நீதிபதிகளின் எண்ணிக்கை 26 ஆக உயர்கிறது. சுப்ரீம் கோர்ட்டில் அனுமதிக்கப்பட்ட நீதிபதிகளின் எண்ணிக்கை 31 என்பது குறிப்பிடத்தக்கது.

ஊசி போட பணம் வசூல் : திண்டுக்கல் தலைமை ஆஸ்பத்திரி ஊழியர்கள் 21 பேர் மீது நடவடிக்கை

திண்டுக்கல் : திண்டுக்கல் அரசு தலைமை ஆஸ்பத்திரியில் பணியாற்றும் நர்சுகள், அடிப்படை பணியாளர்கள் 21 பேர் மீது நடவடிக்கை எடுக்குமாறு லஞ்ச ஒழிப்பு போலீசார் அரசுக்கு பரிந்துரை செய்துள்ளனர். திண்டுக்கல் அரசு ஆஸ்பத்திரியில் பணியாற்றும் நர்சுகள், அடிப்படை பணியாளர்கள் 21 பேர் மீது வார்டுகளில் தங்கியிருக்கும் நோயாளிகளிடம், ஆபரேஷன், பிரசவ வார்டுகளுக்கு வருபவர்களிடமும், ஊசி போடவும், மருந்து வாங்கவும் பணம் வசூலில் ஈடுபட்டதாக புகார் எழுந்தது. 2004ம் ஆண்டு திண்டுக்கல் லஞ்ச ஒழிப்பு பிரிவு போலீசார் இந்த வழக்கினை பதிவு செய்தனர்.


இது தொடர்பாக நடந்த விசாரணை தற்போது முடிவடைந்துள்ளது. புகாருக்கு உள்ளான 21 பேரும் தவறு செய்துள்ளதாகவும், இவர்கள் மீது துறைவாரியான நடவடிக்கை எடுக்க வேண்டும் எனவும் லஞ்ச ஒழிப்பு பிரிவு போலீசார் அரசுக்கு பரிந்துரை செய்துள்ளனர். இதன்படி மூன்று பேர் சஸ்பெண்ட் ஆகும் வாய்ப்புகள் உள்ளதாகவும், மற்றவர்களுக்கு பதவி உயர்வு உட்பட பல்வேறு பாதிப்புகள் ஏற்படும் எனவும் போலீசார் தெரிவித்தனர்.

அவதூறு வழக்கு போடுவேன் : மதுகோடா கோபம்

சுயேச்சை எம்.எல்.ஏ.,வாக இருந்து முதல்வரானதற்காக கின்னஸ் புத்தகத்தில் இடம் பெற்றவர் ஜார்க்கண்ட் முன்னாள் முதல்வர் மதுகோடா. இவர், முதல்வராக இருந்த காலத்தில் பல ஆயிரம் கோடி ரூபாய் ஹவாலா பணத்தை வெளிநாடுகளில் முதலீடு செய்துள்ளதாக அமலாக்கத்துறை அதிகாரிகளும், வருமான வரித்துறை அதிகாரிகளும் இவரது வீட்டில் அதிரடி சோதனையிட்ட பின் தெரிவித்துள்ளனர். இந்நிலையில், ஜார்க்கண்ட் மாநிலத்தில் ஐந்து கட்டமாக சட்டசபைத் தேர்தல் நடைபெற உள்ளது. முதல் கட்ட தேர்தல் வரும் 25ம் தேதி துவங்குகிறது.

தற்போது, லோக்சபா எம்.பி.,யாக உள்ள மதுகோடா, நடைபெற உள்ள சட்டசபைத் தேர்தலில் தனது மனைவி கீதாவை, சிங்பும் மாவட்டம் ஜகன்னாத்பூர் தொகுதியில் நிற்க வைத்துள்ளார். இதற்கான பிரசாரத்தில் ஈடுபட்டுள்ள மது கோடா குறிப்பிடுகையில், "பல ஆயிரம் கோடி ஹவாலா பணத்தை வெளிநாடுகளில் முதலீடு செய்துள்ளதாக என் மீது கூறப்பட்டுள்ள புகார்கள் அனைத்தும் அடிப்படையில்லாதவை. என் மீது கூறப்பட்ட இந்த புகார்கள் நிரூபிக்கப்பட்டால், நான் அரசியலில் இருந்து விலகுகிறேன். நடைபெற உள்ள தேர்தலில் என் நற்பெயரை குலைப்பதற்கான முயற்சியில் எதிரிகள் ஈடுபட்டுள்ளனர். அவர்கள் மீது அவதூறு வழக்குகளை தொடருவேன்' என்றார்.

போலி தங்க காசு மோசடி: 8 பெண்கள் உள்பட 11 பேர் கைது

திருநெல்வேலி, நவ. 15: தென் மாவட்டங்களில் போலி தங்க காசுகள் கொடுத்து பொதுமக்களை ஏமாற்றியதாக 8 பெண்கள் உள்பட 11 பேர் ஞாயிற்றுக்கிழமை கைது செய்யப்பட்டனர். அவர்களிடமிருந்து 26 பவுன் நகைகள் மீட்கப்பட்டன. 100-க்கும் மேற்பட்ட போலி தங்க காசுகள், போலி நகைகள், நகை செய்ய பயன்படுத்திய இயந்திரம் ஆகியவை பறிமுதல் செய்யப்பட்டன.

இதுகுறித்து திருநெல்வேலி சரக டி.ஐ.ஜி. கண்ணப்பன், செய்தியாளர்களிடம் மேலும் கூறியதாவது: தனிப்படை மேற்கொண்ட விசாரணையில், சேலம் அருகே கொண்டலாம்பட்டி கிராமத்தைச் சேர்ந்த சுமார் 30 குடும்பத்தினர் கடந்த 20 ஆண்டுகளுக்கு மேலாக தங்க காசு மோசடியில் ஈடுபட்டு வருவது தெரியவந்தது.


இக் கும்பலைச் சேர்ந்த பெண்கள் பல்வேறு கிராமங்களுக்குச் சென்று அங்குள்ள பெண்களிடம் ஊருக்குச் செல்ல பணம் தேவைப்படுவதாக கூறுவர். தங்களிடம் தங்க காசுகள் இருப்பதாகவும், அதற்கு ஈடாக ஏதாவது தரும்படியும் கேட்பார்கள். அவர்களது பேச்சை நம்பும் பெண்களிடம் பணம் வாங்கிக் கொண்டும், வேறு சிலரிடம் பாதிக்குப் பாதி சலுகையில் கம்மல், தோடு, மூக்குத்தி, செயின் போன்ற நகைகளை வாங்கிச் சென்றதும் தெரிய வந்துள்ளது.


செம்புக் காசுகள்: சேலம் அருகே முத்துநாயக்கன்பட்டியைச் சேர்ந்த மாது ஆசாரி (55), அவரது மகன் வெங்கடேஷ் (30) ஆகியோர் செம்புத் தகட்டில் இரண்டு கிராம் எடையில் காசுகளைத் தயாரித்துள்ளனர். அக்காசுகளில் தங்க முலாம் பூசி, 22 காரட் என சீல் வைத்து இக்கும்பலுக்கு தலா ரூ.150-க்கு விற்பனைச் செய்துள்ளனர். மாது ஆசாரியும் அவரது மகனும் தலைமறைவாகி விட்டனர். அவர்களது வீட்டில் இருந்து ஏராளமான போலி தங்க காசுகளும், அவற்றைத் தயாரிக்கப் பயன்படுத்திய இயந்திரங்களும் பறிமுதல் செய்யப்பட்டன. இந்த மோசடி தொடர்பாக கொண்டலாம்பட்டியைச் சேர்ந்த கும்பல் தலைவி துர்கா (50) உள்ளிட்ட 8 பெண்கள், 3 ஆண்கள் செய்யப்பட்டனர். ஆந்திரத்தின் குண்டூர், நெல்லூர், புதுச்சேரியிலும் இந்த கும்பல் மோசடியில் ஈடுபட்டது தெரிய வந்துள்ளது என்றார்.

ரூ 3000 லஞ்சம் வாங்கிய வணிகவரி உதவி கமிஷனர் துரைராஜ் கைது

திருமங்கலம்:மதுரை அருகே முகவரி மாற்ற ரூபாய் 3 ஆயிரம் லஞ்சம் வாங்கிய வணிகவரி உதவி கமிஷனர்(பொறுப்பு) துரைராஜ் கைது செய்யப்பட்டார்.

ஸ்ரீவில்லிபுத்தூர் அருகே வன்னியம்பட்டியை சேர்ந்த அரவிந்தன் (27). மின்சாதன பொருட்கள் ஏஜன்சி நடத்தி வருகிறார். அதே தெருவில் வேறொரு இடத்திற்கு ஏஜன்சியை மாற்றவும், டி.கல்லுப்பட்டி மெயின் ரோடு மற்றும் மம்சாபுரத்தில் கிளைகளை திறக்க முடிவு செய்தார். இதற்காக அனுமதி எண் (டின் எண்) பயன்படுத்த அனுமதி கேட்டு வணிகவரித்துறைக்கு விண்ணப்பித்திருந்தார்.


இதற்காக வணிகவரி உதவி கமிஷனர்(பொறுப்பு) துரைராஜ், 5000 ரூபாய் லஞ்சம் கேட்டார். முன்பணமாக 1000 ரூபாயை வாங்கிக் கொண்டார்.நேற்று காலை வணிகவரித்துறை அலுவலகத்திற்கு வந்த அரவிந்தன் சான்றிதழ்களை கேட்டார். அதற்கு துரைராஜ் மீதிப்பணம் ரூ. 4 ஆயிரத்தை கொடுத்தால் மட்டுமே சான்றிதழ் கொடுப்பேன் என கூறியுள்ளார். பின்னர் 3 ஆயிரம் ரூபாய்க்கு துரைராஜ் சம்மதித்துள்ளார்.
இது குறித்து அரவிந்தன் மதுரை லஞ்ச ஒழிப்பு துறை டி.எஸ்.பி., குலோத்துங்கனிடம் புகார் கொடுத்தார். இதையடுத்து டி.எஸ்.பி., தலைமையில் இன்ஸ்பெக்டர்கள் மணிமாறன், ஜெயக்குமார், ரமேஷ் மற்றும் போலீசார், ரசாயன பவுடர் தடவிய 3000 ரூபாயை அரவிந்தனிடம் கொடுத்தனர். அதை அலுவலகத்தில் வைத்து துரைராஜிடம கொடுத்தார். அதை வாங்கிய துரைராஜை போலீசார் கைது செய்தனர்.

லஞ்சவழக்கில் தன்டனை பெற்று தலைமறைவான வி.ஏ.ஒ., சரண்

ராமநாதபுரம்:லஞ்ச வழக்கில் தலைமறைவான முன்னாள் வி.ஏ.ஒ., ராமநாதபுரம் கோர்ட்டில் சரணடைந்தார். ராமநாதபுரம் மாவட்டம் ரெகுநாதபுரம் குருப் வி.ஏ.ஒ.,வாக பணிபுரிந்தவர் நாகலிங்கம்(50) இவர் 1998ல் மேல வலசையை சேர்ந்த சரவணன் என்பவரிடம் வாரிசு சான்றிதழ் வழங்க 500 ரூபாய் லஞ்சம் கேட்டார். சரவணன் புகாரின் படி ராமநாதபுரம் லஞ்ச ஒழிப்பு போலீசாரால் 5.8.1998ல் கைது செய்யப்பட்டார். இதன் வழக்கு ராமநாதபுரம் சி.ஜே. எம். கோர்ட்டில் நடந்து வந்தது.

விசாரணை செய்த நீதிபதி, லஞ்சம் வாங்கிய வி.ஏ.ஒ.,க்கு ஒராண்டு சிறை தண்டனை, 4000 ரூபாய் அபராதம் விதித்து 27.8.2003ல் தீர்ப்பளித்தார். இதை தொடர்ந்து வி.ஏ.ஒ., பணிநீக்கம் செய்யப் பட் டார்.கோர்ட் தீர்ப்பை எதிர்த்து மதுரை ஐகோர்ட் கிளையில் மேல்முறையீடு செய்தார்.இதன் மனு 30.6.2009ல் ஐகோர்ட் கிளையில் தள்ளுபடி செய்யப்பட்டு, கீழ் கோர்ட்டில் வழங்கிய தீர்ப்பை உறுதி செய்தது. இதன்பின் நாகலிங்கம் தலைமறைவானார். இவர் மீது வாரன்ட் பிறப்பிக்கப்பட்ட நிலையில் லஞ்ச ஒழிப்பு போலீசார் தேடி வந்தனர். இந் நிலையில் தலைமறைவான நாகலிங்கம் ராமநாதபுரம் சி.ஜே.எம். கோர்ட்டில் நேற்று சரணடைந்தார். கோர்ட் உத்தரவுப் படி போலீசார் அவரை கைது செய்து மதுரை மத்திய சிறையில் அடைத்தனர்.

கோவை வடக்கு ஆர்.டி.ஓ., அலுவலகத்தில் லஞ்ச ஒழிப்பு போலீசார் ரெய்டு : ஒரு லட்சத்து 20 ஆயிரம் சிக்கியது.

கோவை வடக்கு ஆர்.டி.ஒ., அலுவலகத்தில் லஞ்ச ஒழிப்பு போலீசார் நேற்று இரவு நடத்திய அதிரடி சோதனையில் 5 புரோக்கர்கள் பிடிபட்டனர். இவர்களிடமிருந்து ஒரு லட்சத்து 20 ஆயிரம் ரூபாய் கைப்பற்றப்பட்டது. கடந்த ஆறு மாதங்களுக்கு முன் கோவை துடியலூர் வெள்ளக்கிணர் ரோட்டில் கோவை வடக்கு வட்டார போக்குவரத்து அலுவலகம் துவக்கப்பட்டது. கோவை வடக்கு பகுதியில் உள்ள 40க்கும் மேற்பட்ட சிறு நகரங்களை உள்ளடக்கிய இந்த அலுவலகம் வாடகை கட்டடத்தில் செயல்படுகிறது. இங்கு புதிய வாகனங்களை பதிவு செய்தல், பெயர் மாற்றம், ஓட்டுனர் உரிமம் பெறுதல், பழகுனர் உரிமம் பெறுதல் உள்ளிட்ட பல்வேறு பணிகள் மேற்கொள்ளப்பட்டு வருகிறது.

போக்குவரத்து அலுவலக தொடர்பான பணிகளை மேற்கொள்ள புரோக்கர்களின் உதவியோடு அதிகாரிகளுக்கு லஞ்சம் வழங்கப்படுவதாக புகார்கள் வந்தன. இதை தொடர்ந்து கோவை லஞ்ச ஒழிப்புத் துறை டி.எஸ்.பி. (பொறுப்பு) பெரோஸ்கான் தலைமையில் இன்ஸ்பெக்டர்கள் ஞானசேகரன், சுந்தரராஜன், உன்னிகிருஷ்ணன் உள்ளிட்ட அதிகாரிகள் நேற்று மாலை போக்குவரத்து அலுவலகத்துக்குள் அதிரடியாக நுழைந்தனர். அலுவலகத்தின் அனைத்து கதவுகளும் அடைக்கப்பட்டு, விசாரணை மேற்கொள்ளப்பட்டது.அலுவலகத்தில் மேற்கொள்ளப்பட்ட பணிகள் அதற்காக பெறப்பட்ட தொகைகள் குறித்து கணக்கீடு செய்யப்பட்டது. இதில், அலுவலகத்தின் கணக்கிற்கு வராத ஒரு லட்சத்து 20 ஆயிரம் ரூபாய் புரோக்கர்களிடம் இருப்பது கண்டுபிடிக்கபட்டு, கைப்பற்றப்பட்டது. மேலும், விசாரணையில், உரிமம் உள்ளிட்ட ஆர்.டி.ஒ., ஆபீசின் பல்வேறு பணிகளுக்காக புரோக்கர்களாக செயல்பட்ட திருமூர்த்தி, பாபு, சுரேஷ்குமார், ஜெயக்குமார், சண்முகசுந்தரம் ஆகியோரை பிடித்து விசாரணை மேற்கொண்டனர். இவர்கள் தெரிவித்த தகவலின் அடிப்படையில் ஆர்.டி.ஒ., ஆபீசுக்கு எதிரே உள்ள கவுதம் மற்றும் செல்வநாயகி ஜெராக்ஸ் கடைகள் புரோக்கர்களின் தகவல் தொடர்பு மையமாக செயல்பட்டது கண்டுபிடிக்கப்பட்டது.

இது தொடர்பாக அவர்களிடமும் லஞ்ச ஒழிப்புத் துறை போலீசார் விசாரித்தனர். ""கணக்கில் காட்டப்படாமல் புரோக்கர்கள் வைத்திருந்த தொகை தொடர்பாக அலுவலக அதிகாரிகளுக்கும் நோட்டீஸ் அனுப்பப்பட்டு விசாரிக்கப்படுவர்'' என லஞ்ச ஒழிப்பு போலீசார் தெரிவித்தனர். நேற்று மாலை 4.40 மணிக்கு ஆர்.டி.ஒ., அலுவலகத்துக்குள் நுழைந்த லஞ்ச ஒழிப்பு போலீசார் நள்ளிரவு 11 மணிவரை சோதனை நடத்தினர். இதனால் அப்பகுதியில் பெரும் பரபரப்பு ஏற்பட்டது.

நீலகிரி சேதத்துக்கு லஞ்ச, ஊழலே காரணம் : விஜயகாந்த்

நீலகிரியில் ஏற்பட்டுள்ள சேதத்துக்கு லஞ்ச, ஊழலே காரணம் என தே.மு.தி.க., தலைவர் விஜயகாந்த் தெரிவித்துள்ளார். ஊட்டி, குன்னூர், கோத்தகிரி, குந்தா பகுதிகளில் ஆயிரம் வீடுகளுக்கு மேல் இடிந்துள்ளன. சுமார் 1,400 ஏக்கர் விளைபயிர் சேதமடைந்துள்ளது. காடுகளை அழித்தும், மரங்களை வெட்டியும் கற்பாறைகளை உடைத்தும் கண்ட இடங்களில் எல்லாம் சட்டத்துக்குப் புறம்பாக குடியிருப்புக்கள் அமையக் காரணம் அரசியல்வாதிகளிடமும் , அரசாங்க அதிகாரிகளிடமும் தாண்டவமாடும் லஞ்ச, ஊழல் தான் என அவர் குற்றஞ்சாட்டியுள்ளார்.

என் மீதான குற்றச்சாட்டுக்கள் ஆதாரமற்றவை,நான் அப்பாவி : மதுகோடா

ராஞ்சி : ஜார்கண்ட் முன்னாள் முதல்வர் மதுகோடா வெளிநாடுகளில் சட்டவிரோதமாக சொத்து வாங்கி குவித்ததாக புகார் எழுந்தது. இதனைதொடர்ந்து மதுகோடாவுக்கு சொந்தமான இடங்களில் அமலாக்க பிரிவினர் மற்றும் வருமான வரித்துறையினர் சோதனை செய்தனர். இந்நிலையில் மதுகோடா தன் மீதான குற்றச்சாட்டுக்கள் அனைத்தும் ஆதாரமற்றவை என்றும், தான் அப்பாவி எனவும், தனக்கும் இந்த முறைகேடிற்கும் எந்த தொடர்பும் இல்லை

இந்த விவகாரத்தில் மீடியாக்கள் தன்னையை முன்னிலைப்படுத்துவதால் தேர்தலில் போட்டியிடவில்லை என்றும், தனது குடும்பத்தாருடன் இருந்த தனிமைபடுத்தப்பட்டுள்ளதாகவும் கூறியுள்ளார்.

பொதுமக்களிடம் ரூ25ஆயிரம் லஞ்சம் :கள்ளக்குறிச்சி வட்டாட்சியர் அன்பரசன் கைது

கள்ளக்குறிச்சியில் பொதுமக்கள் பயன்படுத்தவதற்கான பொது பாதை அமைக்க பொதுமக்களிடம் ரூ25ஆயிரம் லஞ்சம் பெற்ற வட்டாட்சியர் அன்பரசன் கைது செய்யப்பட்டார். கள்ளக்குறிச்சியில் பொதுமக்கள் பயன்படுத்துவதற்கான பொது பாதையை அமைக்க வட்டாட்சியர் அன்பரசனிடம் அப்பகுதி பொதுமக்கள் சார்பில் சிவபாலன் எனபவர் கோரிக்கைவைத்தார்.

அதோடு பொதுப்பாதை அமைக்க நீதிமன்றம் வழங்கிய உத்தரவையும் காட்டினார். ஆனால் வட்டாட்சியர் அன்பரசன் பொதுப்பாதை அமைக்க வேண்டுமானால் ரூ25ஆயிரம் லஞ்சம் தரவேண்டும் என்ற வலியுறுத்தினார். இதனால் அதிர்ச்சி அடைந்த சிவபாலன் லஞ்ச ஒழிப்பு போலீசில் புகார் அளித்தார்.

புகாரை ஏற்ற போலீசார் அன்பரசனின் வீட்டை கண்காணித்துவந்தனர். இந்நிலையில் அன்பரசன் தன் வீட்டில் வைத்து சிவபாலனிடம் ரூ25 அயிரத்தை லஞ்சமாக பெற்றதை மறைந்திருந்து கண்காணித்த லஞ்ச ஒழிப்பு போலீசார் வட்டாட்சியர் அன்பரசனை கையும் களவுமாக பிடித்தனர். அவர் மீது லஞ்ச வழக்கு பதிவு செய்யப்பட்டது. துறைவாரியான நடவடிக்கைக்கும் பரிந்துரை செய்யப்பட்டுள்ளது.

லஞ்ச நடவடிக்கைகள் புற்றுநோயைப் போன்றவை. ஜனாதிபதி பிரதிபா பாட்டீல்

டில்லியில் யு.பி.எஸ்.சி., சார்பில் ஏற்பாடு செய்யப்பட்டிருந்த விழாவில், ஜனாதிபதி பிரதிபா கலந்து கொண்டார். அதில் அவர் பேசியதாவது: லஞ்சம் மற்றும் ஊழல் நடவடிக்கைகள் அதிகரித்து விட்டன. லஞ்சம் என்பது புற்றுநோயைப் போன்றது. நாட்டின் வளர்ச்சிக்கு இது பெரும் பாதிப்பை ஏற்படுத்தும். நாட்டின் கட்டமைப்பு வசதிகளையே சீர்குலைத்து விடும். லஞ்சம், ஊழல் இல்லாத வெளிப்படையான நிர்வாகத்தை ஏற்படுத்த வேண்டும்.



பொது வினியோக திட்டம் போன்றவற்றில் லஞ்சமும், ஊழலும் அதிகரித்தால் பெரும் பாதிப்பு ஏற்படும். இத்திட்டம், ஏழை மக்களுக்கு உணவுப் பொருட்கள் வழங்குவதற்காக ஏற்படுத்தப்பட்டது. வறுமையையும், பசியையும் முற்றிலும் ஒழிக்க வேண்டும் என்பதற்காக இத்திட்டம் கொண்டு வரப்பட்டது. இதில், ஊழல் நடந்தால், ஏழை மக்கள் கடும் பாதிப்பிற்கு ஆளாவர். இதுபோன்ற செயல்களால், நாட்டின் வளங்கள் குறையும். மற்ற நாடுகளை விட, வளர்ச்சியில் நாம் பின் தங்கி விடுவோம். இவ்வாறு பிரதிபா பேசினார்.

ஊனமுற்றவரிடம் லஞ்சம்; செங்கம் ஊராட்சி துணை வட்டார வளர்ச்சி அலுவலர் அண்ணாமலை கைது

இதயம் இல்லாத மனிதன். ஊனமுற்றவர்களிடம் லஞ்சமா! கேட்கவே வெட்கமாக உள்ளது


செங்கம் தாலுக்கா ரோடு கரியமங்கலம் கிராமத்தை சேர்ந்தவர் மணிவேல் (29). விபத்தில் சிக்கி கை ஊனமாகி எந்த வேலையும் செய்யாமல் பெற்றோர் பராமரிப்பில் இருந்தார். சவுண்ட்சர்வீஸ் வைப்பதற்காக தாட்கோ மூலம் ரூ.50 ஆயிரம் கடன்கேட்டு அனைத்து ஆவணங்களுடன் மாவட்ட ஆட்சியர் அலுவலகத்தில் மனுதந்துள்ளார்.


மனு சரியாக இருப்பதாகவும் உடன் கையெழுத்து இட்டு அனுப்புமாறு செங்கம் ஊராட்சி ஒன்றியத்திற்கு மனு அனுப்பப்பட்டு உள்ளது. துணை வட்டார வளர்ச்சி அலுவலர் (ஆதிதிராவிடர் நலம்) அண்ணாமலை என்பவர் மணிவேல்யிடம் ரூ.400 லஞ்சம் கேட்டு ஒருமாதமாக அலைகழித்துள்ளார்.

என்னிடம் பணமில்லை நான் ஊனமானவன். பெற்றோர் பராமரிப்பில் உள்ளேன் என மணிவேல் கூறியும் கையெழுத்து போட அண்ணாமலை மறுத்து விட்டாராம்.


இது குறித்து மணிவேல் வேலூர் லஞ்ச ஒழிப்பு போலீசில் கொடுத்த புகாரின் பேரில் டி.எஸ்.பி. ராமேஸ்வரி இன்ஸ்பெக்டர்கள் நந்தகுமார், வேலு மற்றும் போலீசார் ரசாயனம் தடவிய ரூபாயை மணிவேலிடம் தந்தனர். அந்த பணத்தை லஞ்சமாக அண்ணாமலை வாங்கிக்கொண்டு கையெழுத்து போடும் போது மறைந்திருந்த லஞ்ச ஒழிப்பு போலீசார் துணை வட்டார வளர்ச்சி அலுவலர் அண்ணாமலையை கைது செய்தனர்.


பதிவு பிடித்திருந்தால் மறக்காமல் வாக்களித்து ஆதரவு
தருமாறு கேட்டுக் கொள்கிறேன்

ஆஸ்திரேலியாவில் வேலை வாங்கித் தருவதாக 10 லட்சம் ரூபாய் மோசடி

சென்னை புறநகர் போலீஸ் கமிஷனர் அலுவலகத்தில் நேற்றைய பொதுமக்கள் குறை தீர்க்கும் முகாமில், பழைய வண்ணாரப்பேட்டையைச் சேர்ந்த ஜெயராமன் உள்ளிட்ட 21 இளைஞர்கள் அளித்த மனுவில் கூறியிருப்பதாவது:ராஜகீழ்ப்பாக்கம் ராகவா கார்டன் பகுதியைச் சேர்ந்த பிரேம்நாத்(35); விநாயகா எண்டர்பிரைசஸ் என்ற நிறுவனத்தை நடத்தி வந்தார். அவரது தங்கை ஆஸ்திரேலியாவில் இந்தியன் ரெஸ்டாரன்ட்டை நடத்தி வருவதாகவும், அங்கு வேலை செய்ய ஆட்களை தேர்வு செய்வதாகவும் கூறினார்.

தேர்வானவர்கள் மூன்று மாதத்தில் அங்கு அனுப்பி வைக்கப்படுவர் என கூறினார். இதற்காக ஒவ்வொருவரிடமும் தலா 50 ஆயிரம் ரூபாய் பெற்றுக் கொண்டார்.இதை நம்பி எங்கள் பகுதியை சேர்ந்த 21 பேர், 10 லட்சத்து 50 ஆயிரம் ரூபாய் கொடுத்தோம். மூன்று மாதம் கழித்து கேட்டதற்கு உங்களுடைய பெயர் லிஸ்ட்டில் வரும் வரை காத்திருங்கள் என கூறினார்.
ஆறு மாதங்கள் கழித்து கேட்டதற்கு,"எனக்கு போன் செய்தால் போதும்' என, கூறினார். ஏமாற்றப்பட்டதை உணர்ந்த நாங்கள், பணத்தை திரும்ப தரும்படி கேட்டோம். கடந்த 3ம் தேதி பணத்தை திரும்பத் தருவதாகக் கூறினார். பின்னர் அவர் கொடுத்த மொபைல் போனை தொடர்பு கொண்டால் "ஸ்விட்ச் ஆப்' என, வருகிறது. ஏழ்மையான குடும்பத்தைச் சேர்ந்த எங்கள் பணத்தை திரும்ப பெற்றுத் தர நடவடிக்கை எடுக்க வேண்டும்.இவ்வாறு புகார் மனுவில் கூறப்பட்டிருந்தது. புகாரை பெற்ற புறநகர் போலீஸ் கமிஷனர் ஜாங்கிட், சம்பந்தப்பட்ட போலீஸ் நிலைய இன்ஸ்பெக்டரை நடவடிக்கை எடுக்கும்படி உத்தர விட்டார்.

ரூ.2 இலட்சம் லஞ்சம் வாங்கிய I A S அதிகாரி கைது

பஞ்சாப் மாநில தொழில் மற்றும் வாணிபத் துறையின் செயலராகப் பணியாற்றிவரும் இந்திய ஆட்சிப் பணி அதிகாரி ரூ.2 இலட்சம் லஞ்சம் வாங்கும் போது ஊழல் தடுப்பு அதிகாரிகளால் கைது செய்யப்பட்டுள்ளார்.

பஞ்சாப் மாநிலம் மொஹாலியில் உள்ள தனது அலுவலகத்திற்கு நேற்று வந்த லூதியானாவைச் சேர்ந்த தொழில் அதிபரிடமிருந்து தொழில் மற்றும் வாணிபத் துறையின் செயலர் மற்றும் இயக்குனராக உள்ள விஜய் குமார் ஜான்ஜூவா லஞ்சம் வாங்கியபோது அவரை ஊழல் தடுப்பு அதிகாரிகள் கைது செய்தனர்.

கைது செய்யப்பட்ட I A S அதிகாரி விஜய் குமார் மொஹாலி குற்றவியல் நடுவர் மன்ற நீதிபதி லலித் குமார் சிங்ளா முன் நிறுத்தப்பட்டார். அவரை வியாழக்கிழமை நீதிமன்றத்தில் நிறுத்துமாறு நீதிபதி உத்தரவிட்டார். அவரை 10 நாள் விசாரணைக் காவலில் எடுக்க ஊழல் தடுப்புத் துறை மனுச் செய்துள்ளது.

கைது செய்யப்பட்டுள்ள விஜய் குமார் ஜான்ஜூவா 1998ஆம் ஆண்டுப் பிரிவைச் சேர்ந்து I A S அதிகாரி ஆவார். இவருடைய சொத்து, வங்கி இருப்பு ஆகியவற்றை ஊழல் தடுப்பு அதிகாரிகள் ஆய்வு செய்து வருகின்றனர் பி.டி.ஐ. செய்தி கூறுகிறது.

லஞ்சம் வாங்கிய விருதுநகர் நகராட்சி ஊழியர்களுக்கு 3 ஆண்டு சிறை

ஸ்ரீவில்லிபுத்தூர்: விருதுநகர் நகராட்சியில் லஞ்சம் வாங்கிய வழக்கில், ஊழியர்கள் இருவருக்கு தலா மூன்று ஆண்டு சிறைத் தண்டனை விதித்து, ஸ்ரீவில்லிபுத்தூர் முதன்மை குற்றவியல் நீதிபதி தீர்ப்பளித்தார்.

விருதுநகர் நகராட்சியில் துப்புரவுப் பணியாளராக வேலை பார்த்தவர் ராஜபாண்டியன். இவர், 2003 மார்ச் 31 ல் ஓய்வு பெற்றார். ஓய்வூதிய பணப்பயனை கேட்டு, நகராட்சி ஆணையரிடம் விண்ணப்பித்தார். இது தொடர்பான பைல் சுகாதார உதவியாளர் பாத்திமா வசம் இருந்தது. ராஜபாண்டியனுக்கு 26,516 ரூபாய் வரவேண்டியதுள்ளதால், பில் எழுதஇரண்டாயிரம் ரூபாய் பாத்திமா லஞ்சமாக கேட்டுள்ளார் இது தொடர்பாக ராஜபாண்டியன் விருதுநகர் லஞ்ச ஒழிப்பு போலீசாருக்கு தகவல் கொடுத்தார்.

2005 பிப்21ம் தேதி மதியம் நகராட்சிக்கு சென்ற ராஜபாண்டி, பாத்திமாயிடம் பணத்தை கொடுத்தபோது அலுவலக உதவியாளர் சங்கரபாண்டியிடம் கொடுக்கும் படி கூறினார். அவர் கொடுத்தபோது லஞ்ச ஒழிப்பு போலீசார் பிடித்தனர். ஸ்ரீவி., முதன்மை குற்றவியல் நீதிமன்றத்தில் நடந்த இந்த வழக்கை விசாரித்த நீதிபதி முருகாம்பாள், லஞ்சம் வாங்கிய பாத்திமா, சங்கரபாண்டிக்கு தலா மூன்று ஆண்டு சிறைத் தண்டனை விதித்து தீர்ப்பளித்தார்.